Nefni ekki sigurinn í kvöld

Sumir vinir mínir hafa álasað mér fyrir það að blogga strax um sigurleiki Liverpool en gleyma því svo ef liðið tapar. Til þess að sýna fram á að þetta er algjört rugl í þeim mun ég ekki nefna það hér á síðunni að Liverpool vann Newcastle 2:0 í kvöld í ensku úrvalsdeildinni. Hvað þá að Kyut gerði fyrsta mark sitt fyrir Liverpool og að Alonso skoraði frá eigin vallarhelmingi.

Enda var ég í sundi með dóttur minni og vinkonum hennar og sá ekki leikinn, ekki nema síðustu tíu mínúturnar og svo þegar mörkin voru endursýnd.

Þarfasti þjónninn

Þessa frétt af Fréttavef Morgunblaðsins þarf ekki að segja mér tvisvar: 

"Í skýrslu sem verkfræðistofan Hönnun vann fyrir Reykjavíkurborg kemur skýrt í ljós að gríðarleg bifreiðaeign einkennir höfuðborgarsvæðið í samanburði við aðrar borgir í Evrópu. Ekki er búist við að þetta breytist heldur er því spáð að bílaumferðin aukist um þriðjung á næstu 20 árum. Á hádegisfundi Samgönguviku um borgarbrag og samgöngur sagðist Sigurður Guðmundsson skipulagsfræðingur ekki telja ólíklegt að bílaeign og notkun bíla sé komin út í öfgar á höfuðborgarsvæðinu."

Ég bjó á borgarhorninu í 20 ár, flutti burt fyrir rúmum fjórum en bregður satt að segja í brún í hvert skipti sem ég kem orðið í borgina. Umferðin er orðin svo hrikaleg.

Boonyaratglin og Adulyadej

Maður þakkar stundum sínum sæla fyrir að vinna ekki í útvarpi eða sjónvarpi.

Nú er í hverjum fréttatímanum á eftir öðrum fjallað um taílenskan hershöfðingja sem heitir Sonthi Boonyaratglin og konung Taílands, Bhumibol Adulyadej.

Já, það er stundum gott að ýta bara á takkana á tölvunni.

Asnaþvaður

Skemmtilegum spjallþætti var að ljúka á Rás 1. Þórarinn Björnsson ræddi við nafna sinn Sigurmundsson vélstjóra sem var í mörg ár á sjó, fyrst hjá Sambandinu og síðan á dönskum fragtskipum.

Margt bar á góma. Þegar Þórarinn var spurður hvar í heiminum hann hefði séð fallegast kvenfólk sagði hann ómögulegt að segja, en sjómönnum þætti reyndar allt kvenfólk fallegt þegar þeir kæmu í land eftir langa útiveru! Og svo sagði hann að í hverri höfn væri kvenfólk sem vildi selja blíðu sína, og mun meira væri um það í Reykjavík en nokkurn grunaði. . .

Í lok þáttar bað Þórarinn vélstjóri útvarpsmanninn að fara varlega með upptökuna, og skildi reyndar ekki hvernig hann ætti að ná einhverju með viti út úr þessu "asnaþvaðri" í sér!

Þættinum verður útvarpað aftur á laugardaginn og ég held enginn verði svikinn af því að hlusta. Gaman að svona gamaldags - í jákvæðri merkingu - útvarpsefni.

Shinawatra

Var það ekki Thaksin Shinawatra, forsætisráðherra Taílands, sem vildi kaupa Liverpool fyrir nokkrum mánuðum?

Shinawatra blessaður brá sér á allsherjarþing SÞ í New York á dögunum og herinn rændi af honum völdum á meðan. Nú er hann sagður á leið til London en fer vonandi ekki norðar.

Ætli hershöfðingjarnar hafi áhuga á fótbolta?

Inferno

Magnaður lestur hjá Hjalta Rögnvaldssyni á Rás 1 þessa daga. Það er Inferno eftir Strindberg, síðasti lestur reyndar á morgun.

Pétur bloggar

Vinur minn og fyrrverandi samstarfsmaður á Mogganum, Pétur Gunnarsson, er orðinn einn helsti bloggari landsins. Og þar fara saman magn og gæði. Hvet alla sem hafa áhuga á þjóðmálum að bæta Pétri við í tenglasafnið sitt. Slóðin á síðuna er http://www.petrum.blogspot.com/ - Pétur býður oft upp á nýjustu fréttir og sögur úr þjóðlífinu, ekki síst pólitíkinni, enda vel tengdur sem fyrrverandi framkvæmdastjóri þingflokks Framsóknarflokksins.