Húsið á sléttunni

Munur að vera með DR1 í kassanum.

Konan var að fikta í fjarstýringunni og heyrist þá ekki allt í einu kunnuglegt stef og sjáum við þá ekki kunnuglegan herra Ingalls og kunnuglega Láru Ingalls - á að giska 6 ára. Det lille hus på prærien hjá danska ríkinu.

Lífið var erfitt á sléttunni. En það var voða kósí þegar þau lágu i hjónarúminu og borðuðu popp.

Hrunadansinn

Hollt væri það þjóðinni allri að lesa miðopnu Morgunblaðsins í gær þar sem birtur er nýr ljóðabálkur, Hrunadansinn, eftir Matthías Johannessen fyrrverandi ritstjóra okkar á Mogganum.

Þar segir M meðal annars:

Hvort breiðir út faðminn mót Fróni sú mammonsgóða

framtíð sem nú er hvarvetna að allra dómi

efst á baugi í baráttu smæstu þjóða

við basl og örbirgð,

virðing okkar og sómi

er vandasöm fylgd við fjármagn og ofsagróða

þegar fegurð asksins er líkust deyjandi hjómi

og níðhöggs tennur nærast þar við rót

sem nýöld mammons fremur sín heiðnu blót.

Vaxtarrækt og fitness

Siggi Gests heldur Íslandsmót í vaxtarrækt og í fitness um páskana og sjálfsagt að koma því á framfæri hér í einkafjölmiðli mínum. Vissi ekki af því í gær og gat þessa því ekki í Mogganum í dag.

Á morgun, föstudaginn langa, hefst forkeppni í vaxtarræktinni og nýrri grein sem kölluð er módelfitness (og þátttakendur bara konur), kl. 16 og úrslit kl. 20.  Hvort tveggja í Sjallanum.

Á laugardaginn er svo Íslandsmótið í fitness í Höllinni. Forkeppni hefst klukkan 11.30 og úrslit kl. 18.00.

Reikna má með miklu fjöri og harðri keppni á öllum vígstöðvum.

Næsta hús við þriggja hillu sjoppuna

Jæja, þá er Mogginn á Akureyri fluttur úr Kaupvangsstræti 1 - úr fjölmiðlahúsinu, eins og það var einu sinni kallað þegar DV var þar líka með skrifstofu. RÚV var þar þá og er enn.

Við Moggamenn erum nú fluttir í húsnæði Hölds við Tryggvabraut. Í húsinu fyrir neðan er Litla kaffistofan þar sem Kennedyarnir ráku einu sinnu sjoppu og elsta dóttir mín kallaði þriggja hillu sjoppuna.

Í þessum helga stað var nefnilega "laugardagsnammi" í þremur hillum og þótti flottasta sjoppa landsins.

Ætlarðu út að aka?

Ef þú ert á leið til Riga, Vilnius, Tallinn eða Kaunas, og ætlar út að aka, geturðu leigt bíl á 25 evrur á dag, 2200 krónur. Skattar og ótakmarkaður akstur innifalinn. Ég henti óvart póstinum en tilboð um þetta, sem ég fékk sent í fjölpósti í morgun, er frá einhverri leigu sem hefur aðsetur á flugvöllum allra þessara borga.

Ég veit svo sem ekkert hvort þetta er gott tilbúið en gera ráð fyrir því að ekki sé verið að bjóða "Big Spring Rental Offer" nema eitthvað sé í það varið.

Tilboðið gildir til 31. maí.

Góða ferð!

Er verið að gera gys að okkur?

Þýski markvörðurinn Oliver Kahn tilkynnti í dag á blaðamannafundi að hann yrði í landsliðshópnum á HM í fótbolta í sumar - að hann myndi sætta sig við þá ákvörðun Klinsmanns landsliðsþjálfara að Jens Lehmann yrði í byrjunarliðinu! Að Lehmann yrði aðal markvörður liðsins.

Und?

Þjóðverjar óttuðust að Kahn móðgaðist og drægi sig í hlé og svo virðist sem allir séu gapandi hissa á því að hann lýsti því yfir að verkefnið framundan væri mun mikilvægara en svo að Oliver Kahn eða einhver annar einstaklingur skipti sköpum. Undrandi að hann skyldi láta það út úr sér að liðsheildin skipti mestu máli.

Hvernig stendur á því að þetta þykir svona mikil frétt? Auðvitað er Kahn ekki hress með ákvörðun Klinsmanns, hann vill auðvitað vera í liðinu en þjálfarinn ræður. Hélt einhver að Kahn ætti markmannsstöðuna?

Hefði það verið skynsamlegt af Kahn að fara í fýlu og hætta? Hvað ef Lehmann meiðist í næsta leik og verður óleikfær á HM?

Ekki ég heldur

Villepin forsætisráðherra Frakklands fullyrti í dag að hann hefði engan áhuga á að verða forseti landsins.

Bara svo það fari ekkert á milli mála þá hef ég heldur ekki áhuga á djobbinu.

Mjög gott og mjög slæmt

Breskt sjónvarpsefni er örugglega það besta í heimi; allt leikna efnið, hvort sem eru bíómyndir eða framhaldsþættir og svo heimildarmyndir og þar fram eftir götunum. Svo eiga Bretar og reka bestu útvarpsstöð í heimi.

Þess vegna finnst mér ótrúlegt hve margar breskar sjónvarpsauglýsingar eru hræðilega vondar, a.m.k. þær sem sýndar eru aftur og aftur á fréttastöðinni Sky. Hefur einhver velt þessu fyrir sér? Mér finnst undarlega margar eins og búnar til fyrir algjöra bjána.

Ferðasaga - No balls

Verðandi sjöttubekkingar í MA fóru til Krítar síðsumars 1981. Okkur fannst fátt um innfætt kvenfólk á ferli í grennd við hótelið (sem var úti í auðninni, þannig að þetta átti sér eðlilegar skýringar - en sagan væri ónýt öðru vísi en hafa þetta svona) og eftir nokkra daga kom skýringin í ljós. Eða svo fannst í það minnsta tveimur ungum drengjum úr norðurhöfum.

Okkur Ormarri datt í hug að fara í borðtennis og spurðum gaurinn í lobbíinu hvort hann gæti lánað okkur kúlu.

Og hann svaraði: "I'm sorry. We don't have any balls..."

Staðreyndirnar tala sínu máli . . .

Smá upplýsingar, bara svo þetta sé á hreinu.

Núið skiptir auðvitað mestu máli í íþróttakeppni en það er ekki verra að hafa unnið marga titla á árum áður líka. Og fimmti Evrópumeistaratitillinn vannst vorið 2005, ekki gleyma því. Þá var gaman í Istanbul.

Og nú er verið að telja í aftur; einn, tveir, þrír, fjór ... Rafa og strákarnir bæta væntanlega í bikarasafnið áður en langt um líður.

The Liverpool FC Trophy Cabinet
League Champions	European Cup	FA Cup	League Cup
Liverpool 18	Real Madrid 9	Man-United 11	Liverpool 7
Man-United 15	AC Milan 6	Arsenal 9	Aston Villa 5
Arsenal 13	Liverpool 5	Spurs 8	Notts Forest 4
Everton 9	Ajax 4	Aston Villa 7	Leicester 3
Aston Villa 7	Bayern Munich 4	Liverpool 6	Spurs 3
		Newcastle 6	Chelsea 3
		Blackburn 6